https://innews.az/uploads/news/2024-12/_innews_c0490a91a8a793028a0f52626_o.jpg
Bakı Dövlət Universitetinin (BDU) Filologiya fakültəsinin təşkilatçılığı ilə böyük Azərbaycan şairi Məhəmməd Füzulinin 530 illiyinə həsr olunmuş “Füzuli yaradıcılığı: ideya, üslub, poetika problemləri” mövzusunda Respublika elmi konfransı keçirilib.
Plenar iclasın moderatoru, BDU-nun Azərbaycan ədəbiyyatı tarixi kafedrasının dosenti Məti Bayramlı Azərbaycan filoloji fikir tarixində böyük filosof-şairin yeri, ölkəmizdə füzulişünaslığın inkişafı və Məhəmməd Füzulinin yubileylərinin dövlət səviyyəsində qeyd olunmasının əhəmiyyətindən danışıb.
BDU-nun Tədrisin təşkili və təlim texnologiyaları üzrə prorektoru, professor Fərda İmanov Füzulinin 530 illik yubileyinin qeyd olunması ilə bağlı Azərbaycan Prezidenti cənab İlham Əliyevin imzaladığı Sərəncamın tarixi əhəmiyyətindən və bu münasibətlə BDU-da təşkil olunan müxtəlif tədbirlərdən, ölkəmizdə Füzuli irsinin, sənətkarlığının və yaradıcılığının öyrənilməsində Universitetdə fəaliyyət göstərən alimlərin müstəsna xidmətlərinin olduğundan söz açıb.
Azərbaycan Dövlət Pedaqoji Universitetinin Beynəlxalq əlaqələr üzrə prorektoru, tanınmış şair və alim, professor Mahirə Nağıqızı Azərbaycan ədəbiyyatında Füzuli dühasının xüsusi mərhələ təşkil etməsi, şairin özündən sonra Şərqdə böyük məktəb yaratması, uzun əsrlər Füzuli ənənələrinin uğurla davam etdirilməsini qeyd edərək, şairin hikmət xəzinəsinin bütün dövrlər üçün əhəmiyyətli olduğunu və bu zəngin irsin gələcək nəsillərə aşılanmasının vacibliyini diqqətə çatdırıb.
Plenar iclasda Azərbaycan Dillər Universitetinin Azərbaycan ədəbiyyatı kafedrasının müdiri, akademik Muxtar İmanov “Folklordan görünən Füzuli”, BDU-nun Ərəb filologiyası kafedrasının professoru Aidə Qasımova “Füzuli həmmamiyyəsi və onun ərəb ədəbiyyatındakı öncül nümunələri”, BDU-nun Azərbaycan ədəbiyyatı tarixi kafedrasının dosenti Sevinc Qocayeva “Məhəmməd Füzuli yaradıcılığında su və onun atributları” adlı məruzələrlə çıxış ediblər.
Sonda Filologiya fakültəsinin dekanı, dosent Elçin Məmmədov çıxış edərək, Məhəmməd Füzulinin ədəbi-bədii və fəlsəfi fikrin inkişafında rolundan, dahi sənətkarın irsinin öyrənilməsi ilə bağlı görülən işlərdən danışaraq, qonaqlara, o cümlədən iştirakçılara təşəkkürünü bildirib, konfransın işinə uğurlar arzulayıb.
Konfrans öz işini dörd bölmə iclası ilə davam etdirib. Professor Yaqub Babayevin sədrliyi ilə “Məhəmməd Füzuli yaradıcılığında mövzu və ideya problemləri”, professor Yeganə İsmayılovanın sədrliyi ilə “Füzuli ədəbi məktəbi və Füzulinin tədqiqatçıları”, dosent Sevda Sadıqovanın sədrliyi ilə “Füzuli əsərlərinin dil və üslub xüsusiyyətləri” və dosent Könül Həsənovanın sədrliyi ilə “Füzuli sənətkarlığı” mövzularında keçirilən bölmə iclaslarında qırxdan çox məruzə dinlənilib.
