https://innews.az/uploads/news/2025-02/_innews_8c4a7ff0a72e472ca6c42ab62_o.jpg
44 günlük Vətən müharibəsindən 4 ildən artıq vaxt ötür. O tarixi günlərin hər saatını, dəqiqəsini belə xatırlamamaq mümkün deyil. Silaha sarılaraq torpaqlarımızın erməni işğalından azad edilməsində iştirak etmək , yağıları doğma Qarabağımızdan qovmaq minlərlə Vətən övladının çoxdankı arzusu olmuşdur.
Erməni separatizminin kökünü kəsmək,30 illik işğala son qoymaq üçün 2020-ci ilin sentyabrında yaranmış əlverişli şərait hər bir azərbaycanlını düşməndən qisas almağa çağırırdı.
İşğalla heç vaxt barışmayacağını bildirən xalqımız və onun şanlı ordusu öz siyasi lideri, Azərbaycan Respublikasının Prezidenti, Ali Baş Komandan İlham Əliyevin rəhbərliyi altında qarşıda bizi gözləyən Zəfərə tam səfərbər olmuşdu.
Müharibə ağrısız-acısız,itkisiz olmur.Torpağımızın hər qarışına tökülən şəhid qanı onun nə qədər müqəddəs və candan artıq olduğuna bariz nümunədir.
Haqqında danşacağım şəhid Vidadi Xəlilov hərbi qulluqçudan çox Vətən sevgisi ilə yaşayan, gənc yaşlarından düşmənə nifrət hissi ilə böyüyən və hərbçi olmaqla həyatını orduda xidmətə həsr edən nümunəvi komandir idi.
Göyçayda ziyalı ailəsində dünyaya göz açan Vidadi orta məktəbi bitirdiyi 1999-cu ildə Heydər Əliyev adına Azərbaycan ali hərbi məktəbinə yüksək göstəricilərlə qəbul olunur. 2003-cü ildə həmin məktəbi "motoatıcı" hərbçi-ixtisası üzrə bitirərək, leytenant rütbəsi alır.
Vidadi 2003-2004-cü illərdə Müdafiə Nazirliyinin təlim-tədris mərkəzində ixtisas kursu keçdikdən sonra 2004-cü ildə Müdafiə Nazirliyinin əmrinə əsasən xidməti davam etdirmək üçün Azərbaycan Respublikası Silahlı qüvvələrinin “N” saylı hərbi hissəsinə göndərilir. Xidmət dövründə hərb işində özünü bacarıqlı və bilikli zabit kimi göstərir.Şəxsi keyfiyyətləri, məsuliyyəti və peşəsinə olan sevgisi tez bir zamanda ona uğurlar qazandırır - polkovnik-leytenant rütbəsinə qədər yüksəlir.
Hələ 2016-cı ilin aprel hadisələri zamanı Vidadi Xəlilov və onun tabeliyində olan hərbçilərin qəhrəmanlığı barədə Göyçayda çox danışılırdı. Vidadi heç vaxt ümidini üzmürdü, hətta doğmaları ilə telefon əlaqəsi saxlayarkən o tarixi günün- şanlı Zəfərin uzaqda olmadığını və qələbənin yaxınlaşdığını qeyd edirdi. Köksündə bir əminlik vardı - qələbə sevincini, qələbə müjdəsini Azərbaycan əsgərinin xalqımıza çatdıracağı məqam yetişib.
2020-ci ilin sentyabrı.
Bütün vətənpərvər insanlarımız kimi, Vidadi üçün də əsl tarix yazmaq vaxtı çatmışdı.Bu, həm də onun çoxdankı arzusu idi-torpaqlarımızı işğaldan azad etmək, Qarabağın beşiyi olan Şuşamızı, xarabalığa çevrilmiş digər şəhər və rayonlarımızı erməni əsirliyindən qurtarmaq, xalqımızı illərdən bəri həsrətində olduğu yurd-yuvasına qovuşdurmaq.
Polkovnik-ieytenant Vidadi Xəlilov Silahlı Qüvvələrimizin Quru Qoşunlarının zabiti kimi üzərinə düşən vəzifənin məsuliyyətini yaxşı dərk edirdi.İlk növbədə, tabeliyində olan, öz övladları qədər sevdiyi gənc əsgər və zabitlərin qayğısına qalmaq,onları düzgün təlimatlandırmaq,döyüş tapşırıqlarını yerinə yetirərkən ayıq-sayıq olmaq, hiyləgər düşmənə savaş meydanında aman verməmək və sona qədər vuruşmaq..
Əslində Vətən yolunda şəhidlik zirvəsinə ucalmaq qədər şərəfli heç nəyin olmadığını Vidadi dəfələrlə dilə gətirmişdi. Elə Cəbrayıl və Qubadlı uğrunda gedən döyüşlərdə də ermənilərin 100-dən artıq canlı qüvvəsini məhv edən komandirin “şəhid olmaq şərəfdir”deməyi onun Vətən sevgisindən xəbər verirdi.”Qubadlı fatehi” kimi məşhur olan Vidadinin əsas hədəfi isə Şuşa idi.
Vidadinin şəxsi keyfiyyətləri barədə ailə üzvləri və cəbhə dostları danışarkən səmimiyyətini, mehribanlığını və gülərüzlüyünü xüsusi qeyd edirdilər.Əsgərlərini balası qədər sevdiyini, onlarla dost və ata münasibətində olduğunu söyləyirdilər.
“Qubadlı fatehi”ni düşündürən isə erməni tapdağı altında qalmış ərazilərimizdən yağıları qovmaq,qələbə bayrağını Şuşada dalğalandırmaq idi.
30 oktyabr 2020-ci il .
Şəhər və kəndlərimizin bir-birinin ardınca azad edilməsi sorağı gəlir.Xalqımız və bütün dünya diqqətlə cəbhədəki vəziyyəti izləyir. Düşmənin nəfəsini kəsən əsgər və zabitlərimiz şanlı ordumuzun peşəkarlığını ,yenilməzliyini bir daha dünyaya sübut edir.
Vidadi döyüşlərin mərkəzində-Laçın istiqamətində mövqelərdədir. Şəhid olmaq arzusu onu bu dağların zirvəsinədək gətirmişdi.Zirvədən zirvəyə qalxmaq,sən demə, hər kəsə qismət olmurmuş.Ölümsüzlüyə qovuşmağın, ona bir ömrü Vətənə həsr etməyin nə qədər dəyərli olduğunu elə həmin an yaşatdı.Yaşatdı ki, bu torpaq Vidadiyə və bütövlükdə, Vətən uğrunda şəhid olmuş bütün övladlarımıza əbədi sevgi qazandırsın..
Düşmən gülləsi onu Laçın qayalıqlarında yaxaladı.
Son döyüş və son söz..Şəhid Vidadi Xəlilovun ölümü bir arzusunu-Şüşanı azad etmək arzusunu yarımçıq qoydu. Amma qəlbinin dərinliklərində gəzdirdiyi bu müqəddəs missiyanı Azərbaycan Ordusunun cəngavər döyüşçüləri şərəflə yerinə yetirdilər.
Göyçay əhalisi, ictimaiyyət nümayəndələri və sadə insanlar onu son mənzilə böyük izdihamla yola saldılar.
Bu gün Göyçayın Şəhidlər Xiyabanı – müqəddəs məkan,rayon sakinlərinin and yeridir.
Vidadi Xəlilov da bu məkanda, doğulduğu torpaqda əbədiyyətə qovuşub.
Allah rəhmət eləsin.
Torpaq, uğrunda ölən varsa, Vətəndir!
Azərbaycanın Cəbrayıl rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.12.2020-ci il tarixli sərəncamına əsasən Vidadi Xəlilov ölümündən sonra "Cəbrayılın azad olunmasına görə" medalı ilə təltif edildi.
Azərbaycanın Qubadlı rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli sərəncamına əsasən Vidadi Xəlilov ölümündən sonra "Qubadlının azad olunmasına görə" medalı ilə təltif edildi.
Azərbaycanın Laçın rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli sərəncamına əsasən Vidadi Xəlilov ölümündən sonra "Laçının azad olunmasına görə" medalı ilə təltif edildi.
Qubadlı fatehi Vidadi Xəlilovun Vətənə əmanət etdiyi iki övladı qaldı-Zəhra və Vaqif.
Göyçayda bir küçə var..
Müharibədən sonra həmin küçənin açılışında iştirak etdim. Xatirə şəkilləri də çəkdirdik. Onlar hər ikisi qürurla dayanmışdılar.Atalarının adı yazılmış xatirə lövhəsini qızı Zəhra və oğlu Vaqif küçənin girəcəyində divara sancdılar.Zəhra atas kimi vətənpərvər, ünsiyyəti sevən,alovlu nitqi ilə hər kəsin qəlbinə yol tapan qız övladı,Vaqif isə onun yolunu davam etdirəcək son beşiyidir.
Allah qorusun!
Maarif Rzayev
ADU-nun (BDU) Jurnalistika fakültəsinin məzunu
