https://innews.az/uploads/news/2026-03/_innews_d5edd8535ac10e3999e45f093_o.jpg
Özbəkistandakı səfirliyi nəzdindəki Heydər Əliyev adına Azərbaycan Mədəniyyət Mərkəzi və Daşkənddə fəaliyyət göstərən Yunus Əmrə Türk Mədəniyyət Mərkəzi ilə birgə 18 mart 1915-ci il Çanaqqala Zəfərinin 111-ci və 12 mart 1921-ci il İstiqlal Marşının qəbulunun 105-ci ildönümü münasibətilə tədbir keçirib.
Mərasimdə Yunus Əmrə Türk Mədəniyyət Mərkəzinin və Heydər Əliyev adına Azərbaycan Mədəniyyət Mərkəzinin əməkdaşları, Özbəkistanın və Türkiyənin elm və mədəniyyət xadimləri, tələbələr iştirak ediblər.
Tədbirin əvvəlində Azərbaycan, Türkiyə və Özbəkistanın dövlət himnləri səsləndirilib.
Tədbir çərçivəsində tələbələr görkəmli türk şairi Məhməd Akif Ərsoyun “Çanaqqala” şeirindən parçalar təqdim ediblər.
Azərbaycan Mədəniyyət Mərkəzinin direktoru Akif Marifli çıxış edərək 18 mart 1915-ci il Çanaqqala Zəfərinin türk dünyasının tarixində mühüm yer tutduğunu vurğulayıb. O qeyd edib ki, biz Çanaqqala zəfərinin şanlı tarixini qeyd edərkən, yalnız bir hərbi qələbəni deyil, bütün türk dünyasının birlik və həmrəylik ruhunu xatırlayırıq. Ona görə də, bu Zəfər təkcə Osmanlı dövlətinin deyil, bütün türk xalqlarının qəhrəmanlıq salnaməsi kimi tarixə düşmüşdür. Direktor bildirib ki, heç də təsadüfi deyil ki, Çanaqqala döyüşlərində Anadolu türkləri ilə yanaşı Azərbaycan türkləri də iştirak etmiş və qardaş Türkiyənin müdafiəsi uğrunda mübarizə aparmışlar.
Akif Marifli vurğulayıb ki, bu gün Azərbaycan, Türkiyə və Özbəkistan arasında mövcud olan dostluq və əməkdaşlıq münasibətləri ortaq tarix, mədəniyyət və mənəvi dəyərlərə əsaslanır. Onun sözlərinə görə, Azərbaycan Respublikasının Prezidenti İlham Əliyev, Türkiyə Respublikasının Prezidenti Rəcəb Tayyib Ərdoğan və Özbəkistan Respublikasının Prezidenti Şavkat Mirziyoyevin həyata keçirdikləri siyasət nəticəsində qardaş və dost ölkələr arasında münasibətlər bütün sahələrdə uğurla inkişaf edir və mədəni-humanitar əməkdaşlıq daha da genişlənir. Direktor qeyd edib ki, Çanaqqala Zəfəri türk xalqlarının birlik və həmrəyliyinin parlaq nümunəsi olaraq gənc nəslin vətənpərvərlik ruhunda tərbiyəsində mühüm rol oynayır.
Daha sonra Yunus Əmrə Türk Mədəniyyət Mərkəzinin koordinatoru, doktor Ahmet Özkan və İstanbul Mədəniyyət Universitetinin təmsilçisi, professor doktor Alim Yılmaz çıxış edərək Çanaqqala döyüşlərinin tarixi əhəmiyyəti barədə geniş məlumat veriblər. Onlar bildiriblər ki, 1915–1916-cı illərdə Osmanlı dövləti ilə ANTANTA dövlətləri arasında baş vermiş Çanaqqala döyüşləri təkcə hərbi qələbə deyil, eyni zamanda türk xalqının mübarizə ruhunun və milli iradəsinin təntənəsi kimi tarixə düşmüşdür.
Çıxışlarda qeyd olunub ki, Çanaqqala Zəfəri türk xalqının azadlıq və müstəqillik uğrunda apardığı mübarizənin ən parlaq səhifələrindən biridir. Həmçinin bildirilib ki, Türkiyə Cümhuriyyəti qurulduqdan sonra ingilis və fransız donanmalarının geri çəkilməyə məcbur edildiyi gün – 18 mart Çanaqqala Şəhidlərini Anma Günü kimi qeyd olunur.
Natiqlər həmçinin İstiqlal Marşının qəbulunun türk xalqının milli kimliyinin formalaşmasında mühüm rol oynadığını vurğulayaraq, Məhməd Akif Ərsoyun bu əsərinin bu gün də türk dünyasında vətənpərvərlik və azadlıq ideallarının simvolu kimi böyük ehtiramla qarşılandığını bildiriblər.
Tədbirin sonunda iştirakçılarla fikir mübadiləsi aparılıb və məruzəçilər tədbir iştirakçılarının suallarını cavablandırıblar.
