https://innews.az/uploads/news/2026-03/_innews_d9fc706cace74bd4cd02b90b2_o.jpg
Martın 3-də Azərbaycan Dövlət Pedaqoji Universitetinin (ADPU) Təhsil menecmenti ixtisaslaşmasının birinci tədris ili magistrantlar üçün interaktiv dərs təşkil edilib. Dərs "2019-2023-cü illər üçün Azərbaycan Respublikasının ali təhsil sisteminin beynəlxalq rəqabətliliyinin artırılması üzrə Dövlət Proqramı" çərçivəsində Böyük Britaniyanın Şeffild Universitetinin doktorantura səviyyəsində təhsil alan Leyla Cabbarzadə tərəfindən keçirilib. Dərsdə ADPU-nun Magistratura və doktorantura şöbəsinin müdiri s.e.ü.f.d. Rəşad Sadıqov, müdir müavini f.ü.f.d. İlkin Əsgərov, tütor İlkin Quluzadə və magistrantlar iştirak ediblər.
Hibrid şəkildə təşkil olunmuş dərsin moderatoru ADPU-nun elm və innovasiyalar üzrə prorektoru professor Asəf Zamanov olub. Dərsi giriş sözü ilə açan professor Asəf Zamanov ali təhsil müəssisələrinin beynəlmiləlləşmə strategiyalarının müasir dövrdə prioritet istiqamətlərdən biri olduğunu vurğulayıb, qlobal reytinqlərdə mövqe qazanmaq, beynəlxalq elmi şəbəkələrə inteqrasiya və birgə tədqiqat platformalarının yaradılmasının əhəmiyyətindən bəhs edib. Prorektor ADPU-da elmi-tədqiqat mühitinin gücləndirilməsi istiqamətində həyata keçirilən tədbirlər, beynəlxalq əməkdaşlıq əlaqələrinin genişləndirilməsi və akademik mobilliyin təşviqi barədə məlumat verib.
Leyla Cabbarzadə ali təhsil sistemində beynəlmiləlləşmə siyasətinin əsas istiqamətləri, universitetlərin qlobal tərəfdaşlıq strategiyaları, elmi nəşrlərin indekslənməsi, qrant layihələrində iştirak mexanizmləri və tədqiqat potensialının artırılması yolları barədə geniş təqdimatla çıxış edib. O, tədqiqat universiteti modelinin üstünlüklərini, doktorantura təhsilində beynəlxalq elmi rəhbərlik institutunun rolunu və multidissiplinar yanaşmanın elmi nəticələrin keyfiyyətinə təsirini konkret nümunələr əsasında izah edib.
İnteraktiv müzakirə formatında keçən dərs tələbələrin sualları və praktiki təklifləri ilə davam edib, beynəlxalq elmi əməkdaşlığın perspektivləri və ADPU-da tədqiqat mühitinin daha da inkişaf etdirilməsi istiqamətində konkret təkliflər səsləndirilib.
Sonda professor Asəf Zamanov mövzunun aktuallığını bir daha vurğulayaraq, belə təşəbbüslərin ali təhsil müəssisələrinin strateji inkişafına mühüm töhfə verdiyini qeyd edib, Leyla Cabbarzadəyə təqdimatına görə təşəkkürünü bildirib.
