ADPU nümayəndələri “Milli Koxlear İmplant Forumu 2026”da iştirak ediblər

Koxlear İmplantlı Şəxslərə Sosial Yardım İctimai Birliyinin təşkilatçılığı ilə respublikada ilk dəfə olaraq Beynəlxalq Koxlear İmplant Gününə həsr olunmuş “Milli Koxlear İmplant Forumu 2026” keçirilib. Forumun əsas məqsədi ölkəmizdə koxlear implant daşıyıcılarının həyat keyfiyyətinin yüksəldilməsi, onların sosial inteqrasiyasının gücləndirilməsi, eləcə də bu sahədə fəaliyyət göstərən mütəxəssislər arasında əməkdaşlığın inkişaf etdirilməsidir.

Tədbirdə Azərbaycan Dövlət Pedaqoji Universitetinin (ADPU) Xüsusi təhsil kafedrasının professor-müəllim heyəti və magistrantları, həmçinin Məktəbəqədər təhsil fakültəsinin dekanı, dosent Nailə Hüseynova iştirak ediblər.

Forumda fəxri qonaq qismində çıxış edən dosent Nailə Hüseynova tədbirin əhəmiyyətindən danışaraq ölkəmizdə koxlear implant istifadəçilərinin sosial və təhsil mühitinə inteqrasiyasının vacibliyini vurğulayıb. O, həmçinin universitet rəhbərliyinin salamlarını iştirakçılara çatdıraraq forumun işinə uğurlar arzulayıb.

Panel müzakirələrdə ADPU-nun Xüsusi təhsil kafedrasının baş müəllimi, defektoloq-loqoped Adilə Mürsəlova və kafedranın müəllimi, psixopedaqoq Afət İsrafilova spiker qismində çıxış ediblər. Onlar koxlear implantlı şəxslərin təhsil və reabilitasiya prosesində tətbiq olunan müasir yanaşmalar, inklüziv təhsil mühitində psixoloji-pedaqoji dəstək mexanizmləri barədə fikirlərini bölüşüblər.

Forum çərçivəsində mütəxəssislər, təhsil və səhiyyə sahəsinin nümayəndələri tərəfindən koxlear implant daşıyıcılarının sosial adaptasiyası, erkən diaqnostika və reabilitasiya imkanlarının genişləndirilməsi, həmçinin cəmiyyətin bu sahədə maarifləndirilməsi məsələləri müzakirə olunub.