https://innews.az/uploads/news/2026-11/_innews_9fcd36c18593163f0941f753a_o.jpg
Ginekomastiya oğlan uşaqlarında süd vəzi toxumasının xoşxassəli böyüməsi ilə xarakterizə olunan vəziyyətdir. Müxtəlif yaş dövrlərində müşahidə oluna bilər və əsasən hormonal dəyişikliklərlə əlaqədardır.
Yenidoğulmuşlarda anadan keçən estrogen hormonlarının təsiri nəticəsində yarana bilər. Bu hal, adətən, bir neçə həftə ərzində öz-özünə geriləyir.
Ginekomastiyanın həqiqi və yalançı formaları mövcuddur. Həqiqi ginekomastiya vəzili toxumanın böyüməsi, yalançı ginekomastiya (lipomastiya) isə döş nahiyəsində piy toxumasının toplanması nəticəsində yaranır. Sonuncu daha çox artıq çəkili uşaqlarda müşahidə edilir.
Əsas səbəblər arasında hormonal balansın pozulması, testosteron çatışmazlığı, qaraciyər və qalxanabənzər vəzi xəstəlikləri, bəzi dərman vasitələrinin istifadəsi və digər hormonal problemlər yer alır.
Əlamətləri döş nahiyəsində böyümə, gilə altında toxumanın hiss edilməsi, həssaslıq və ağrı ola bilər.
Diaqnoz pediatr və ya uşaq endokrinoloqu tərəfindən müəyyən edilir. Zərurət olduqda hormonal analizlər və ultrasəs müayinəsi aparılır.
Müalicə səbəbdən asılıdır. Fizioloji hallarda həkim nəzarəti kifayət edə bilər. Digər hallarda əsas xəstəliyin müalicəsi, seçilmiş vəziyyətlərdə dərman müalicəsi və nadir hallarda cərrahi müdaxilə tətbiq olunur.
Mütəxəssislər uşaqlarda döş nahiyəsində böyümə müşahidə edildikdə vaxtında tibbi müayinədən keçməyi tövsiyə edirlər.
Vusal Artyom
Ən son xəbərləri səhifəmizdən də izləyin
