https://innews.az/uploads/news/2026-11/_innews_b79a79834086b107d6663c48d_o.jpg
3 mart 2026-cı il tarixində Azərbaycan Respublikası Daxili İşlər Nazirliyinin təşkilatçılığı ilə “Qadınlara qarşı zorakılıq hallarının qarşısının alınmasında strateji əməkdaşlıq: imkanlar və perspektivlər” mövzusunda elmi-praktiki konfrans keçirilib.
Konfransda “Peşəkar Psixoloqlar” İctimai Birliyinin (PPİB) təsisçisi və sədri, psixoloq və mediator Səbinə İsmayılova da iştirak edib.
Tədbir çərçivəsində ailə-məişət zəminində törədilən hüquq pozuntuları, erkən evlilik hallarının ağır fəsadları və hüquqi məsuliyyəti, eləcə də evlənmək məqsədilə adam oğurluğu (qızqaçırma) kimi aktual məsələlər müzakirə olunub. Mövzular üzrə çıxışlar dinlənilib, mövcud problemlər və onların aradan qaldırılması istiqamətində əməkdaşlıq imkanları ətrafında fikir mübadiləsi aparılıb.
Konfransda qadınlara qarşı zorakılığın qarşısının alınmasında hüquqi mexanizmlərlə yanaşı, psixoloji dəstəyin, maarifləndirmənin və aidiyyəti dövlət qurumları ilə vətəndaş cəmiyyəti institutları arasında institusional əməkdaşlığın vacibliyi xüsusi vurğulanıb.
“Peşəkar Psixoloqlar” İctimai Birliyi hesab edir ki, qadınlara qarşı zorakılıqla mübarizə kompleks yanaşma tələb edir. Bu istiqamətdə profilaktik tədbirlərin gücləndirilməsi, zərərçəkmiş şəxslərə peşəkar psixoloji dəstəyin göstərilməsi, erkən müdaxilə və cəmiyyətdə gender əsaslı zorakılığa qarşı həssaslığın artırılması mühüm əhəmiyyət daşıyır.
İctimai Birliyin bu mövzuda tədbirlərdə iştirakı qadınların və uşaqların müdafiəsi, psixoloji rifahın qorunması və zorakılığın qarşısının alınması istiqamətində əməkdaşlığın inkişafına verilən töhfə kimi qiymətləndirilir.
“Peşəkar Psixoloqlar” İctimai Birliyi (PPİB)
Səbinə İsmayılova
Təsisçi və sədr, psixoloq və mediator
Ən son xəbərləri səhifəmizdən də izləyin
